ქართველი წყალბურთელები თურქეთის ძლევით ევროპის ჩემპიონატს ნაბიჯით მიუახლოვდნენ

საქართველოს წყალბურთელთა ეროვნული ნაკრებმა „ოლიმპიკის" აუზში  ევროპის ჩემპიონატის ფლეი ოფის პირველ შეხვედრაში თურქეთს უმასპინძლა და 8:4 დაამარცხა.

თურქეთი ევროპული საზომებით გრანდს არ განეკუთვნება, მაგრამ ევროპის ჩემპიონატების ფინალურ ეტაპებზე ასპარეზობის გამოცდილება უმაგრებს ზურგს. ოთხბურთიანი უპირატესობა კარგი საბაბია განმეორებით შეხვედრაში წარმატებისთვის.

იმ შემთხვევაში თუ 1 მარტს, სტამბოლში, განმეორებით შეხვედრაში საქართველო ოთხბურთიან უპირატესობას არ გაანიავებს, ვლადიმერ ისელიძისა და იოვან პოპოვიჩის გუნდი ბუდაპეშტის ევროპის ჩემპიონატის (13-26 ივლისი) საგზურს დაისაკუთრებს.

საქართველოს ნაკრები: ზურაბ ჭუმბურიძე (მეკარე), ბექა კაპანაძე (მეკარე), ზურაბ რურუა (კაპიტანი), გიორგი ხვედელიანი, დამირ ცრეპულია, მარკო ელეზი, გალაქტიონ ლაითაძე, მარკო იელაჩა, რეზო ჩომახიძე, მიხეილ ბაღათურია, კონსტანტინე გეგელაშვილი, ტატო ნიკოლეიშვილი, მარინკო ფრანიჩევიჩი.